உதிர்கின்ற பூக்கள்...

தன்பாட்டில் கிழியும்

நாட்காட்டியின் பக்கங்களிடையே

நல்ல நேரமும் கெட்ட நேரமும்

எழுதிச் செல்கிறது கிரகநிலை.

கேள்வி கேட்டுச் சலித்துப்போன

என் கவிதை இன்றுடன்

திடீரென என்னைப் பிரிவதாக ஓர் ஒப்பந்தம்.

இன்னமும் பெயரிடப்படாத

என் கவிதைக்கு தலைமுதல் பாதம் வரை

அலங்காரம் செய்து

அழகு பார்த்தவன் நான்.

என் வார்த்தைகளும் கேள்விகளும்

முரண்பட்டுச் சண்டையிட்டபோது

பிறப்பெடுத்துக்கொண்ட என் கவிதை

இன்றுடன் என்னிடமிருந்து

விடைபெற்றுக் கொள்கிறது.

பிரிவுத் துயரில் அவிந்து புழுங்கும்

என் இதயம்

இருபக்க விலாக்களுக்குள்

அகப்பட்டுச் சிறைவாசம் கொண்டு

அழுது புலம்புகிறது.